اسلام آباد: وفاقی وزیر دفاع خواجہ آصف نے کہا ہے کہ ان کی ذاتی رائے کے مطابق کراچی اور گوادر کو وفاق کے زیرِ انتظام ہونا چاہیے، تاہم اس مؤقف پر انہوں نے اپنی جماعت سے کوئی مشاورت نہیں کی اور یہ ان کی ذاتی رائے ہے۔
نجی ٹی وی کے ایک پروگرام میں گفتگو کرتے ہوئے خواجہ آصف نے کہا کہ جدید جمہوری نظام میں مضبوط بلدیاتی ادارے عوامی مسائل کے حل میں کلیدی کردار ادا کرتے ہیں۔ ان کے مطابق پاکستان میں مقامی حکومتوں کا نظام 1980 کی دہائی میں دوبارہ فعال ہوا اور آج کی وفاقی و صوبائی قیادت بھی اسی نظام کا تسلسل ہے۔
وزیر دفاع نے واضح کیا کہ کراچی اور گوادر کے حوالے سے ان کا مؤقف ذاتی نوعیت کا ہے اور اس پر انہوں نے اپنی سیاسی جماعت سے اجازت یا مشاورت نہیں کی۔ انہوں نے کہا کہ ممکن ہے ان کی جماعت بعض نکات سے اتفاق کرے اور بعض سے نہ کرے۔
خواجہ آصف نے کہا کہ پاکستان میں انتظامی اصلاحات اور اختیارات کی نچلی سطح تک منتقلی وقت کی اہم ضرورت ہے۔ ان کے مطابق لسانی یا نسلی بنیادوں پر نئے صوبے بنانے کے بجائے انتظامی بنیادوں پر نئے یونٹس قائم کرنے پر غور کیا جانا چاہیے تاکہ عوام کو بہتر طرزِ حکمرانی اور مؤثر سرکاری خدمات فراہم کی جا سکیں۔
انہوں نے مزید کہا کہ ان کی رائے کا مقصد کسی مخصوص علاقے یا مفاد کی نمائندگی نہیں بلکہ ملک کے انتظامی ڈھانچے کو زیادہ مؤثر اور عوام دوست بنانا ہے۔
